Fólkatingslimirnir fáa samsýning fyri sítt arbeiði í Fólkatinginum. Lønin er samansett av eini grundløn og eini kostnaðarviðbót. Sambært vallógini eru hava limir skyldu til at fáa grundlønina og kostnaðarviðbótina. Tey kunnu altso ikki velja samsýningina fyri sítt arbeiði frá. Tað er eisini vallógin, sum ásetur, hvussu stór samsýningin skal vera.

Tað eru 2 sløg av kostnaðarviðbótum, sum bæði eru skattfrí:

• kostnaðarviðbót I verður veitt limum, sum búgva í Danmark
• kostnaðarviðbót II verður veitt limum, sum eru valdir í Grønlandi og Føroyum

Bústaðarskipanin hjá Fólkatinginum

Í 2009 setti Fólkatingið eina bústaðarskipan í gildi, sum hevur við sær, at Fólkatingið hevur eina íbúð tøka til teir limir, sum hava fastan bústað uttanfyri Sæland.

Endamálið við hesum er, at nývaldir limir, sum lúka treytirnar, ikki nýtast at brúka tíð og orku til at kanna bústaðarmøguleikar í Keypmannahavn, men heldur kunnu hugsavna seg um tað politiska arbeiðið frá fyrsta degi.

Fólkatingið hevur í løtuni:

• 90 íbúðir, sum eru tøkar til limirnar
• 5 íbúðir til limirnar í formansskapinum

Limir, sum fáa eina íbúð, fáa stuðul til dupult húshald. Um Fólkatingið ikki hevur eina íbúð tøka til ein lim, sum hevur fastan bústað uttanfyri Sæland, kann limurin fáa útreiðslur endurgoldnar fyri gistingarhús í Keypmannahavnarøkinum, tá viðkomandi er á fundum, sum eru viðkomandi fyri fólkatingsarbeiðið.

Í serligum førum kann ein slíkur limur heldur fáa viðurgjald fyri ein fastan eykabústað í Keypmannahavnarøkinum, um limurin annars hevði verið noyddur at búð á gistingarhúsi í eitt órímiliga langt tíðarskeið.

Um Fólkatingið, eftir at bústaðir eru útlutaðir til limir við føstum bústaði uttanfyri Sæland, enn hevur tøkar bústaðir, kunnu aðrir fólkatingslimir søkja um at fáa hesar í eitt tingár í senn. Limir, sum fáa ein tøkan bústað eftir hesi reglu, fáa ikki stuðul til dupult húshald.

Gisting á gistingarhúsi í Keypmannahavn

Ein vanligur fólkatingslimur kann í einum álmanakkaári fáa útreiðslur goldnar fyri upp til 12 nætur í gistingarhúsi í Keypmannahavnarøkinum, tá tað hevur samband við fundir, ið eru viðkomandi fyri fólkatingsarbeiðið. Útreiðslurnar verða goldnar, um:

• limurin ikki hevur ein bústað til taks
• limurin ikki fær endurgjald fyri bústaðarútreiðslur
• limurin ikki fær útreiðslur til dupult húshald rindaðar

Gisting á gistingarhúsi í valøkinum

Ein vanligur fólkatingslimur kann í einum álmanakkaári fáa útreiðslur goldnar fyri upp til 12 nætur í gistingarhúsi í tí valdømi, limurin er uppstillaður, í sambandi við fundir í valdøminum, um frástøðan millum valdømið og bústaðin hjá liminum ger tað rímiligt.

Hendan treytin verður mett sum lokin fyri ein lim, sum býr á Sælandi, um limurin er uppstillaður á Fjóni ella í Jútlandi.

Útreiðslur fyri gisting á gistingarhúsið verða tó ikki goldnar fyri limir, sum eru uppstillaðir í Keypmannahavn ella Keypmannahavnar økinum, um limurin lýkur eina av hesum treytunum:

• limurin hevur ein bústað til taks
• limurin fær endurgjald fyri ein fastan eykabústað
• limurin fær útreiðslur fyri dupult húshald goldnar

Fólkatingslimirnir fáa goldið útreiðslurnar til almenna ferðslu og ferðir í sambandi við teirra politiska arbeiði.

Fríkort til almenna ferðslu

Limir í Fólkatinginum kunnu fáa fríkort til

• DSB
• Movia
• Metroina í Keypmannahavn

Fríkortini kunnu brúkast til flutning í sambandi við politiska arbeiðið hjá limunum, harímillum flutning millum bústað og Christiansborg.

Brobizz/ferjuferðir

Útreiðslur til ferjuferðir og brúgvargjald (Storebælt/Øresund) í sambandi við politiska arbeiðið hjá fólkatingslimum verða goldnar av Fólkatinginum. Limirnir kunnu fáa ein Brobizz til endamálið.

Innanríkisflogferðir

Innanríkisflogferðir verða goldnar av Fólkatinginum, um ferðirnar hava samband við politiska arbeiðið hjá fólkatingslimunum. Hetta er galdandi fyri flogferðir millum bústað og Christiansborg og flogferðir í sambandi við politiskar fundir.

Hýruvognar

Útreiðslurnar hjá fólkatingslimum til hýruvognar verða í serligum førum goldnar av Fólkatinginum, tá tað hevur samband við teirra politiska arbeiði. Tað er galdandi fyri hýruvognar millum

• Christiansborg og Københavns Lufthavn
• Christiansborg og Københavns Hovedbanegård
• Christiansborg og Østerport Station
• Christiansborg og metroina á Kongens Nytorv

Í sambandi við tænastuferð fyri Fólkatingið uttanlands, rindar Fólkatingið fyri hýruvogn millum bústaðin hjá liminum og flogvøllin í Keypmannahavn.

Uttan fyri høvuðsstaðarøkið rindar Fólkatingið útreiðslurnar hjá limunum til hýruvogn millum bústað og nærmasta flogvøll/tokstøð, um eingin hóskandi almenn ferðatænasta er. Hesar reglur eru galdandi, tá limir, sum búgva uttan fyri høvuðsstaðarøkið, skulu til ella úr Christiansborg ella eru á tænastuferð fyri Fólkatingið uttanlands.

Á summum leiðum kunnu limir fáa útreiðslur fyri hýruvogn goldnar, tá eingin hóskandi almenn ferðatænasta er. Tað er galdandi millun

• Aalborg Lufthavn og Aalborg Station
• Sønderborg Lufthavn og Sønderborg Station

Koyripeningur fyri at koyra í egnum bili

Fólkatingslimir, sum koyra við egnum bili millum bústað og Christiansborg, bústað og politiskar fundir og Christiansborg og politiskar fundir, kunnu fáa endurgjald, um koyritúrurin verður framdur í staðin fyri eina innanríkisflogferð og ikki er dýrari enn hon.

Limir, sum búgva uttanfyri høvuðsstaðarøkið, kunnu fáa endurgjald fyri at koyra í egnum bili millum bústað og nærmasta flogvøll/tokstøð, um eingin hóskandi almenn ferðatænasta er, og limir skulu:

• til ella úr Christiansborg
• luttaka í eini tænastuferð fyri Fólkatingið uttanlands

Ferðastuðul verður latin eftir satsunum, sum eru ásettir av Skattaráðnum, sbr. § 9 B í líkningarlógini.

Uttanlandsferðir

Tá fólkatingslimir eru á nevndarferðum, sendinevndarvitjanum ella kunningarferðum uttanlands, rindar Fólkatingið útreiðslurnar til flogferðir, gistingarhús, máltíðir o.s.fr.

Fer ein vanligur limur úr Fólkatinginum orsakað av fólkatingsvali ella sjúku, fær limurin fráfaringarsamsýning, ið samsvarar við grundlønina í 6-24 mánaðir. Tíðarskeiðið er treytað av, hvussu leingi limurin hevur verið limur í Fólkatinginum.

Møgilig lønarinntøka og eftirløn v.m. verður mótroknað frá degi 1. Tó verður eingin mótrokning fyri inntøku upp til 160.484 krónur teir fyrstu 12 mánaðirnar (oktober 2024).

Núverandi og fyrrverandi limir av Fólkatinginum kunnu fáa sínar útreiðslur til eftirútbúgving goldnar.

Forvunna upphæddin kann brúkast til at rinda útreiðslur til  eftirútbúgving v.m. í tí limatíðarskeiðnum, har hon eru forvunnin, umframt í einum møguligum fráfaringarlønartíðarskeiði grundað á sama limatíðarskeið.

Fólkatingslimir, sum eru farnir úr Fólkatinginum eftir fólkatingsvalið 1. november 2022 ella fyrr, eru fevndir av reglunum í fyrru eftirútbúgvingarskipanini, smb. kunngerð nr. 1081 frá 6. oktober 2014.